U sklopu manifestacije “Dica i ČAkavica koja se održala na Hvaru sudjelovala su i djeca kaštelanskih Vrtića čije su mentorice bile Nada Jerčić i Meri Žitković čijim su se stihovima i prigodnim igrokazom ujedno i predstavili hvarskoj publici. Bio je to 6. susret malih ČAkavaca koji je osmislila gđa Jadranka Šošić, ravnateljica OŠ Bijači, a čiju su ideju nastavili oživljavati svi oni koji žive ČAkavicu u srcu – da se ne zaboravi, prenoseći je u srca najmlađih i onih malo starijih…

Sudjelovala su tri naša vrtića:

– DV Neven: s igrokazom ČA JE LIPO BIT ŽENSKO

s djecom Iris Marijašević, Ante  Elez, Petar Subašić i voditeljicom Sanjom Pertičević

– DV Tratinčica: s recitacijom KAŠTELANSKE ŠOTOKUCE

s djecom Stela Žanko, Franka Matković i voditeljicom Anom Brčić

– DV Mendula: s recitacijom ĆU, TOVARE i IZ DIŠPETA JE NEBO TAKALA

s djecom Ana Džaja, Ana Marušić i voditeljicom Nadom Jerčić

“ĆU, TOVARE!”
N. Jerčić

Moj je dida
za užancu
jema tovara,
prijateja svoga,
ča ga je sluša
I za njin odija
ka da je pas.

Digod bi se
rasprdeca po dvoru,
u prašini vaja
dok su mu se oči caklile,
ka ditetu
ča u igri nima mire.
Ušiman bi striga
kad mu čagod
ni po voji bilo,
zareva bi s dišpeton,
ma bi jopet pod samar
podmistija tilo.

Gušt je bija gledat
ta dva stara
ča jedan
za drugoga maru:
Ću, pojmo doma!
– tepa bi svon tovaru!

IZ DIŠPETA JE NEBO TAKALA
Nada Jerčić

More je vazelo u modra njidra!
redine, meje i mirine
meju buže je stiskale
da jon se sime ne zatre!

U kaletan je ka i bura kalala
ma ni fermala
iz dišpeta je nebo takala!
Poradi jubavi pod volte je
i ponistre ulizala…

Ka timbar za dušu nan se zadila
pa gre o just do just, utijo,
dok te ne išempja i smanta
poradi liposti svoje!

I nidir, govoridu,
ovakove riči nima,
jerbo je iz stin i truda,
žuja i mižerje rojena –
ča ozvanja u nan:
ota tepla rič dalmatinska
ča je bila – ča je i ča će ostat
zanavike – ovod!

KAŠTELANSKE ŠOTOKUCE

Meri Žitković

ČA ME GLEDAŠ TAKO IDNO

OMA MI TE PUNA GLAVA,

OL TI DUJE NIJE REKA

DA SI BOKUN I BERLAVA

AJDE, LIPO POJDI KVRAGUC !

OSTAVI SE MOGA DUJE.

ČA TI MISLIŠ DA JA NE ZNAN

ČA TI SE U GLAVI KUJE

O. LIPO, LIPO

ZNAMO I BEŠTIMAT,

BIĆE DUJE NJANKA NE ZNA

KOGA ĆE KRAJ SEBE IMAT

ZNA, ZNA, DUJE SVE,

AL TEBI NIKAKO DA SVANE

DA DUJE NIJE BLESAV

I DA MISLI SAMO NA ME

AJDE MUČI, ŠOTOKUCO,

MOREŠ I BOGU PRKOSIT,

TI NE ZNAŠ DA MI JE JUČER

POMOGA I BORŠE NOSIT

POMOGA JE, NEGO ČA,

OL JE ČAGOD DRUGO MOGA

ZNADE I ON BOGU FALA

DA TI JE JEDNA KRIVA NOGA

KRIVA MI JE, E PA ČA

A U KAŠTILA ZNAJU SVI

DA JE TEBI KRIVA

NE JEDNA, NEGO OBE DVI

A GOSPE MOJA, ŠPORKOGA JEZIKA

U OVE LUDE ŽENE,

TEBI NIKAKO NE GRE U GLAVU

DA JE DUJE IZABRA MENE

JUČER SMO BILI U ŠKURIBANDU,

(JA TAMO INAČE NE GREN)

AL ON ME JE POVUKA

I NA RUKU MI STAVIJA PRSTEN

JE, PRSTEN, MOŠ MISLIT

BIĆE OD LATE

NE VIRUJEN DA JE DUJE LUD

TROŠIT ŠOLDE NA TE

A, VIDI GA,

NIJE LATA NEGO ZLATO!

A ČA MI SAD

IMAŠ REČ NA TO?

VAMO, VAMO

RUKU OKRENI,

ISTOGA TAKVOGA DA JE

JUČER I MENI

A ČA SE VI SMIJETE?

BOJE DA ZAČEPITE UŠI

DA NIŠTA NE ČUJU

A MI JEMAMO POSLA

GREMO JEDAN ČAS NAĆ DUJU!

ČA JE LIPO BIT ŽENSKO

Meri Žitković

FRANE:   EJ, MARE! DI PRIŠIŠ, NOGU ĆEŠ IZVRNIT U TE TAKE.

MARE:     GREN U ŠALTURA, SAŠIT NOVU VEŠTU.

FRANE:   OL NE MOREŠ KUPIT U EMEZETE? IMA TI PUNO JEFTINI.

MARE:     MA NIMA DO PRAVEGA MUŠKEGA ŠALTURA. DANAS ĆE MI UZEST MIRE. NISAN NIŠTA OD JUTROS ILA, DA MI BUDE TANJI STRUK.

FRANE:    JE…. PUNO ĆE TI TO POMOĆ. TRIBALA SI DVA MISECA NE IST.

MARE:      MUČI TI ! (stiže u šaltura)

MARE:      DOBAR DAN, ŠJOR ŠALTUR!

ŠALTUR:  E… DOBAR DAN MARE! EVO OVOD STANI DA TI UZMEN MIRE. (miri je)

ŠALTUR:  AJ, SAD MOREŠ DISAT. A KAKVU OĆEŠ VEŠTU?

MARE:      ZA ĐIRAVAT PRIKO RIVE, DOK MI JE DUJE NA RIBE. NEKA IMA BOKUN KOLETA I PUNO FALDI OKO STRUKA I PUNO BOTUNI NA PRSIMA DA SE MUGU RASKOPČAT KAD ME UVATI FUMADA.

ŠALTUR:   A RUKAVI ?   DUGI ILI KRATKI?

MARE:       A KRATKI BOME, DA MI SE VIDI  SAT ČA MI GA JE DUJE KUPIJA ZA ROĐENDAN.

ŠALTUR:   A OĆEŠ DA TI STAVIN BOKUN MERLA OKO VRATA?

MARE:       MA ČA ĆE MI MERLO, NISAN POSTEJA. NEGO ŠJOR ŠALTUR NAPRAVI TI MENI NJU MALO TIŠNJU, DA MI SE VIDE SVE ŽUNTE.

ŠALTUR:    A ĆA ČE TI DUJE REČ?

MARE:       MA BRAVO, BAŠ SAN TI TO TILA REČ. OD TEGA KOMADA ČA UŠTEDIŠ, NAPRAVI NJEMU BOKUN KULARINE, PA SE NEĆE IDIT.

ŠALTUR:    A KO ĆE TO SVE PLATIT?

MARE:       DA KO ĆE PLATITI ? A BOME DUJE! PA OVO SVE I ČININ ZA NJEMU UČINIT KULARINU. AJDE STOJ S MIRON!

ŠALTUR:    BOG, MARE!

FRANE:      E, MARE ! JEL TI UZELO MIRE?

MARE:        UZELO, UZELO, FRANE, MENI MIRE,  A DUJI ŠOLDE.

FRANE:     (prikrsti se) SVETI MOJ JURE SUĆURAČKI, ČUVAJ OVE  LUDE MUŠKE!